Ինչպես ամբողջ աշխարհում, այնպես էլ Հայաստանում, հոկտեբերի 31-ին նշվում է Խնայողությունների համաշխարհային օրը: Հատուկ օրվա նպատակն է հասարակությանը հասանելի դարձնել խնայողություն կատարելու կարևորությունը և գումարը բանկում պահելու առավելությունները:

Այս տարի Միջազգային համագործակցության գերմանական խնայբանկերի հիմնադրամի եւ ՀՀ կենտրոնական բանկի նախաձեռնությամբ կազմակերպվել են խնայողությունների միջազգային օրվան նվիրված միջոցառումներ, որին մասնակցել են Ֆինանսական համակարգի հաշտարարի գրասենյակը, Ավանդների հատուցումը երաշխավորող հիմնադրամը եւ ֆինանսական հատվածի այլ ներկայացուցիչներ:

Միջոցառումները տեղի են ունեցել Հյուսիսային պողոտայում, որտեղ անցորդները ծանոթացել են ներկա գտնվող կազմակերպությունների գործունեությանը, նրանց կողմից առաջարկվող ծառայություններին, ստացել են տեղեկատվական բրոշյուրներ և նյութեր:

Իրականացվել է նաև խաղ-մրցույթ, որի ընթացքում մասնակիցները, պատասխանելով ֆինանսական թեմաներով 3 հարցերի, հնարավորություն են ունեցել շահել մրցանակներ: Հաղթող մասնակիցները ընտրվել են պատահականության սկզբունքով՝ բոլոր հարցերին ճիշտ պատասխանած մասնակիցների հարցաթերթերից վիճակահանության միջոցով:

Խնայողությունների համաշխարհային օրը սկիզբ է առել Իտալիայի Միլան քաղաքում կայացած Խնայբանկերի առաջին միջազգային կոնգրեսից՝ 1924 թվականին, որտեղ կոնգրեսի վերջին օրը՝ հոկտեմբերի 31-ը, հայտարարվել է համաշխարհային խնայողությունների օր: Այդ օրը կոչված էր խթանելու ֆինանսական խնայողություններ կատարելու գործընթացը ողջ աշխարհում: