Վճարային քարտերը դարձել են մեր առօրյայի կարևոր մի մասը և գնալով օգտագործվում են էլ ավելի ու ավելի շատ մարդկանց կողմից: Քարտերը տալիս են բազում հնարավորություններ, որոնցից արժե օգտվել․ ապահով պահել գումարը, հարմար կերպով իրականացնել փոխանցումներ, վճարումներ և այլն:

Վճարային քարտերի արդյունավետ օգտագործումը, թույլ կտա օգտվել թվային ֆինանսական գործիքների լայն հնարավորություններից: Արի՛ տեսնենք, թե ինչ հնարավորություններ է տալիս վճարային քարտերը, ու ինչ կարող ես անել դրանք օգտագործելով:

Ի՞նչ է վճարային քարտը

Վճարային քարտը վճարային համակարգի գործիք է, որը թույլ է տալիս ավելի հեշտ և արագ կերպով վճարումներ և գնումներ կատարել:

Վճարային քարտերը լինում են ըստ վճարման տեսակի (դեբետային և վարկային քարտ), ըստ վճարային համակարգի(ArCa, MasterCard, Visa) և ըստ կիրառման միջավայրի: Ավելին կարող են ծանոթանալ «Քարտ» բաժնում:

Ի՞նչ կարող եք անել վճարային քարտով, և ի՞նչ օգուտներ է այն տալիս

Վճարային քարտերի միջոցով կարող եք կատարել տարբեր տեսակի վճարումներ:

• Գումար ստանալ, փոխանցել և պահել անվտանգ ձևով՝ խուսափելով կորցնելու, գողանալու ռիսկերից։
• Գնումներ կատարել ինչպես մոտակա խանութներից, այնպես էլ աշխարհի ամեն անկյունից  (առցանց գնումներ)։
• Կատարել վճարումներ (կոմունալ վճարումներ, հարկեր և այլն), փոխանցումներ այլ հաշիվների։
• Բանկոմատի միջոցով կանխիկացնել գումար, ստուգել հաշվի մնացորդը, կատարել վճարումներ
• Վերահսկել քո եկամուտներն ու ծախսերը՝ առնվազն ամիսը մեկ անգամ քաղվածք բանկիցստանալով։ Դա կարող ես անել նաև մոբայլ բանկինգ հավելվածի միջոցով:
• Խնայել խնայողական հաշվի կամ ավանդի միջոցով: Որոշ բանկերի մոբայլ հավելվածներով կարող եք նաև ձեռք բերել բաժնետոմսեր ու պարտատոմսեր։

Ինչի՞ն ուշադրություն դարձնել քարտ ձեռք բերելիս

Վճարային քարտը պետք է լինի քո կարիքներին համապատասխան: Բազում քարտերից քեզ ամենահամապատասխան ընտրությունը կատարելուն կօգնի Ֆինանսական տեղեկատուն ՝ FinInfo-ն, որտեղ կարող ես որոնել, համեմատել և ընտրել Հայաստանի բանկերի կողմից առաջարկվող քարտերը:

Մի քանի կանոններ, որոնք կօգնեն քեզ հարմար քարտ ընտրելուն.

• եթե այն օգտագործելու ես միայն դրամ ստանալու ու Հայաստանում ծախսելու համար, ապա կարող ես ընտրել «ArCa» քարտ։ Բայց եթե  քարտով նաև արտասահմանյան գործարքներ ես անելու, ապա նախընտրելի են «MasterCard», «Visa» կամ միջազգային այլ քարտերը,
• եթե քարտով գումար կամ աշխատավարձ ես ստանալու և օգտագործելու տարբեր գնումներ կատարելու համար, ընտրի՛ր դեբետային քարտ­,  իսկ եթե ցանկանում ես քարտիդ վրա գումար ստանալ վարկի տեսքով, ունենալ անվտանգության բարձիկ, վերցրո՛ւ վարկային քարտ: Կան նաև հաշվարկային քարտեր, որոնք միավորում են նախորդ երկու հնարավորությունները: Շատ բանկեր նաև տրամադրում են քատեր հատուկ նպատակների համար, օրինակ՝ ուսանողական, աշխատավարձային քարտեր և այլն,
• ճանապարհորդել սիրող մարդկանց համար կան ճամփորդական քարտեր,

• կան նաև վիրտուալ/թվային քարտեր, որոնք օգտագործվում են միայն ինտերնետ հասանելիությամբ սարքի միջոցով, թվային տիրույթում և անհպում, անկանխիկ վճարումներ կատարելիս։

Ուշադի՛ր եղիր քարտի պայմաններին, այդ թվում՝ որքան են սպասարկման վճարն ու միջնորդավճարները, արդյոք քարտով գնումներ կատարելիս կստանա՞ք գումարի վերադարձ/քեշբեք (cashback) կամ բոնուսներ։

Ի՞նչ կարող եմ անել՝ գտնվելով տանը

Ինչպես արդեն նշել ենք, վճարային քարտերը ժամանակ խնայելու շատ լավ միջոցներ են: Օգտագործելով քո քարտում առկա գումարը՝ դու մոբայլ բանկինգի կամ էլեկտրոնային դրամապանակների միջոցով կարող ես կատարել տարբեր վճարումներ՝ դուրս չգալով տանից: Դու կարող ես.

• կատարել վճարումներ և փոխանցումներ,
• վարկերի ձևակերպում և մարում՝ մոբայլ բանկինգի միջոցով,
• առցանց գնումներ կատարել,
• կատարել կոմունալ վճարումներ,
• խնայել՝ ավանդների և արժեթղթերի միջոցով: