Դեկտեմբերի 14-ին և 15-ին կայացավ  «ՍԻՎԻՏԱՍ» ՀԿ-ի և ՀՀ Կենտրոնական բանկի կողմից համատեղ իրականացվող «Քաղաքացի նախագիծ – ֆինանսատնտեսական հիմնախնդիրների ուսուցման ծրագրի» արդյունքների ներկայացման և ծրագրի փակման հեռավար միջոցառումը։ Ծրագրի նպատակն էր Հասարակագիտություն առարկայի շրջանակներում ֆինանսական գրագիտության խնդիրների արծարծումը, մեկնաբանումը, քննարկումը և ուսուցիչների ու աշակերտների շրջանում ֆինանսական գրագիտության մակարդակի բարձրացումը  նախագծային  ուսուցման միջոցով։

Ծրագրի առաջին փուլում՝  սեպտեմբերի 4-6-ը իրականացվել է եռօրյա հեռավար դասընթաց ՀՀ  Գեղարքունիքի մարզի այն դպրոցների ուսուցիչների հետ, ովքեր արդեն մասնակցել են Կենտրոնական բանկի և ԿԳՄՍՆ-ի կողմից կազմակերպված  «Ֆինանսական կրթությունը դպրոցում» ծրագրի դասընթացներին։

Եռօրյա վերապատրաստման ընթացքում ուսուցիչներն  ուսումնասիրել են նախագծային աշխատանքի բովանդակությունը, միաժամանակ հնարավորություն ունեցել նորարարական մեթոդներով զարգացնել դասերը և նախագծային ուսուցման աշխատանքներին  ուղղված իրենց կարողությունները։

Ծրագրի երկրորդ փուլում փորձագետներն իրականացրել են թվով 27 մենթորային աջակցող դասընթացներ 25 դպրոցների հասարակագիտության ուսուցիչների և սովորողների մասնակցությամբ։  Դասընթացների ժամանակ շեշտադրումն արվել է 21-րդ դարի հմտություններին, այն է՝ համագործակցություն, հաղորդակցություն, տեղեկատվական գրագիտություն, ճկունություն, տեխնոլոգիական գրագիտություն, մեդիագրագիտություն, առաջնորդի ունակություններ, նախաձեռնողականություն և սոցիալական ունակություններ։

Ծրագրի ընթացքում սովորողների կողմից բարձրաձայնվել են համայնքում առկա ֆինանսատնտեսական հիմնախնդիրները, կատարվել են հետազոտություններ՝ հիմնախնդրի հիմնավորման համար, համայնքի բնակիչների հետ անցկացվել են հարցազրույցներ և ձևակերպվել առաջարկվող գործողությունների ու առաջարկների քայլերը։ Ակնկալվում է, որ արդյունքում սովորողները ձեռք կբերեն համարժեք վերաբերմունք և կտարածեն ստացած գիտելիքներն իրենք առօրյա կյանքում։

Նրանք վերոնշյալ խնդիրների լուծման իրենց տարբերակներով և առաջարկություններով կիսվեցին ծրագրի շնորհանդեսին մասնակից պետական և հասարակական կառույցների ներկայացուցիչների հետ։ Վերջիններս իրենց խորհուրդներով, ուղղորդումներով քաջալերեցին սովորողներին շարունակելու  աշխատանքները  ֆինանսատնտեսական գրագիտության խրախուսման նպատակով։