2016 թվականի մարտի 21-ին Դիլիջանի ուսումնահետազոտական կենտրոնում մեկնարկեց Ֆինանսական ներգրավվածության միության (Alliance for Financial Inclusion, AFI) Սպառողների հզորացման և շուկայի վարվելակերպի (Consumer Empowerment and Market Conduct Working Group) և Թվային ֆինանսական ծառայությունների (Digital Financial Services Working Group) աշխատանքային խմբերի հանդիպումները, որոնք կազմակերպվել են ՀՀ կենտրոնական բանկի և Ֆինանսական ներգրավվածության միության կողմից: Հանդիպումները շարունակվելու են մինչև սույն թվականի մարտի 25-ը: 

Կենտրոնական բանկը, երկար տարիներ հանդիսանալով Ֆինանսական ներգրավվածության միության ակտիվ անդամ, այս տարի առաջին անգամ հյուրընկալում է նմանատիպ մասշտաբային միջազգային միջոցառում, որին ներկա են գտնվում մոտ 100 միության անդամ հանդիսացող ներկայացուցիչներ մոտ 40 զարգացող երկրներից:  

Աշխատանքային հանդիպումների ընթացքում քննարկվելու են ֆինանսական ներգրավվածության ներկայիս միտումներն ու առաջխաղացման հնարավորությունները, ինչպես նաև ներկայացվելու են ֆինանսական ոլորտում վարքագծային հետազոտության նոր մոտեցումների կիրառման հնարավորությունները առավել մատչելի և հասանելի ֆինանսական ծառայությունների ներդրման ուղղությամբ:

Հիշեցնենք, որ Ֆինանսական ներգրավվածության միությունը ֆինանսական ներգրավվածության միջազգային ասպարեզի առաջատար կառույցներից է: Միության կողմից իրականացված նախագծերը (անդամակցության հուշագրերի ու աշխատանքային խմբերի) ֆինանսական ծառայությունների ներգրավվածության ու ֆինանսական միջնորդության խորացման լրացուցիչ նախադրյալներ են ստեղծել անդամ երկրների համար:  

Կենտրոնական բանկը 2011 թվականի փետրվարի 8-ից անդամակցում է Ֆինանսական ներգրավվածության միությանը, որն ի թիվս միջազգային այլ կառույցների բարձր է գնահատում Կենտրոնական բանկի հետ առկա համագործակցությունը:

Կենտրոնական բանկը նախագահում է միության` Սպառողների հզորացման և շուկայի վարվելակերպի աշխատանքային խումբը, ինչպես նաև անդամակցում է Թվային ֆինանսական ծառայությունների աշխատանքային խմբին:  

Նախատեսվում է շարունակել համագործակցությունը ֆինանսական ներգրավվածության այլ ոլորտներում ևս: