Հոկտեմբերի 4-ին կայացավ միջազգային վազքի «Երևանի Կիսամարաթոնը», որին ՀՀ կենտրոնական բանկի թիմը մասնակցեց «Առողջ ապրելակերպ, առողջ ֆինանսներ» իրազեկման ծրագրով՝ խրախուսելով ինչպես առողջ ապրելակերպը, այնպես էլ շեշտադրելով անձնական ֆինանսների կառավարման վերաբերյալ գիտելիքների ավելացման կարևորությունը:

Վազքի ավելի քան 1400 մասնակիցներ ստացան անձնական ֆինանսների վերաբերյալ տարբեր թեմաներով կրթական բրոշյուրներ և Abcfinance.am «Ֆինանսներ Բոլորի Համար» ուսուցողական կայքի ստեղծագործական տարրեր:

ՀՀ կենտրոնական բանկի թիմի մասնակիցները կիսամարաթոնին կրում էին շապիկներ ֆինանսական տարբեր խորհուրդներով, որոնք օգտակար են անձնական ֆինանսների կառավարման տեսանկյունից:Խորհուրդներից էին.

• Ես վերցնում եմ այնքան ՎԱՐԿ, որքան կարողանում եմ ՄԱՐԵԼ,
• Մինչև ստորագրելը ուշադիր կարդում եմ պայմանագրի ԲՈԼՈՐ  կետերը,
• Ֆինանսական ծառայությունների գները համեմատում եմ abcfinance.am կայքում, «Ֆինանսական օգնական»-ով
• Գործարքներ կատարելիս վճարային քարտս իմ տեսադաշտում է,
• Վարկ վերցնելիս ուշադիր եմ ոչ միայն անվանական, այլ նաև փաստացի տոկոսադրույքին,
• Ես ապահովագրել եմ ընտանիքիս անդամների առողջությունը,
• Երաշխավոր եմ դառնում լավ մտածելուց հետո միայն. եթե նա չմարի վարկը, ես եմ մարելու,
• Ես կուտակում եմ կենսաթոշակիս համար: