ՀՀ կենտրոնական բանկի և «Գլոբալ Շեյփերս» երիտասարդական կազմակերպության համատեղ նախաձեռնությամբ 14 երեխաներ այցելեցին ՀՀ կենտրոնական բանկի այցելուների կենտրոն, ծանոթացան հայկական դրամի պատմությանը, ՀՀ կենտրոնական բանկի գործառույթներին, ինչպես նաև լսեցին դասախոսություն «Ինչու՞ դառնալ տնտեսագետ» թեմայով: Այցելության ընթացքում քննարկված հետաքրքիր հարցերը լրացուցիչ ոգևորություն և ինքնավստահություն փոխանցեցին երեխաներին՝ հետագայում լավ տնտեսագետներ դառնալու և հայկական տնտեսությունը զարգացնելու համար:

12-14 տարեկան այս երեխաները մասնակցում են «Գլոբալ Շեյփերս» երիտասարդական կազմակերպության «TUMOrrow» նախագծին, որի հիմնական նպատակն է օգնել սահմանափակ սոցիալական հնարավորություններ ունեցող երեխաներին՝ զարգացնելու իրենց գիտելիքները և հմտությունները ստեղծագործական միջավայրում՝ նպաստելով երեխաների անհատական որակների ու ապագայի հանդեպ վստահության բարձրացմանը:

Հիշեցնենք, որ ՀՀ կենտրոնական բանկը Ֆինանսական կրթման ազգային ռազմավարության ներքո իրականացնում է բազմաթիվ ծրագրեր տարբեր թիրախային խմբերի համար: Սույն ծրագրերի շրջանակում ՀՀ կենտրոնական բանկը ակտիվորեն համագործակցում է ֆինանսական հատվածի պետական կառույցների և մասնավոր կազմակերպությունների, ինչպես նաև հասարակական կազմակերպությունների հետ: Այս անգամ ՀՀ կենտրոնական բանկը հաջողությամբ համագործակցեց «Գլոբալ Շեյփերս» երիտասարդական կազմակերպության հետ, որը «Համաշխարհային Տնտեսական Ֆորում»-ի նախաձեռնություններից է: Այն գործում է աշխարհի շուրջ 452 քաղաքներում և ունի ավելի քան 5200 անդամներ ողջ աշխարհում: Երևանում այն գործում է արդեն 3 տարի և հասցրել է իրականացնել ավելի քան 5 խոշոր ծրագրեր: