Հոկտեմբերի 10-ին ՀՀ կենտրոնական բանկում «Իմ ֆինանսների միամսյակ» ծրագրի շրջանակներում տեղի ունեցավ ամփոփիչ սեմինար՝ արտերկրից դրամական փոխանցումներ ստացող հաճախորդների շրջանում բանկային համակարգի նկատմամբ վստահության բարձրացման, ինչպես նաև բանկային հաշիվներ բացելու մշակույթի խթանման նպատակով: Կազմակերպիչներն էին ՀՀ կենտրոնական բանկը և Վերակառուցման և զարգացման եվրոպական բանկը, ինչպես նաև իրենց մասնակցությունն են ունեցել ՀՀ հինգ առևտրային բանկեր:

Ծրագրերի նպատակն էր նպաստել բանկային համակարգի պոտենցիալ հաճախորդների ֆինանսական իրազեկվածության բարձրացմանը, սեփական բյուջեի ճիշտ պլանավորմանն ու կառավարմանը, ինչպես նաև խնայողություն անելու մշակույթի ձևավորմանը: Այդ նպատակով համակարգում վերապատրաստված քսան ֆինանսական խորհրդատուներ անհատական ֆինանսական խորհրդատվություն են տրամադրել դրամական փոխանցումներ ստացող հաճախորդներին և նրանց օգնել ավելի լավ կառավարել անձնական ֆինանսները: Այսպիսով՝ շուրջ 145 հազար մարդ տեղեկատվություն է ստացել, արդյունքում ավելի քան 23 հազար նոր հաշիվներ են բացվել և 26 մլն. դոլար է ներդրվել այս հաշիվներում:

Ծրագիրը ևս մեկ անգամ ապացուցեց, որ ֆինանսական գրագիտությունը արդյունավետ գործիք է փոխելու մարդկանց ֆինանսական վարքագիծը և բարձրացնելու նրանց ֆինանսական բարեկեցության մակարդակը, բացի այդ, ՀՀ առևտրային բանկերի համար այս ծրագիրը հիանալի օրինակ է՝ ֆինանսական կրթման շրջանակում նմանատիպ միջոցառումներ կազմակերպելու տեսանկյունից:

Հաղորդագրությունից օգտվելու դեպքում հղումը սկզբնաղբյուրին պարտադիր է: