ԱՅՍԵԿ միջազգային ուսանողական կազմակերպությունը, ՀՀ Կենտրոնական Բանկի հետ համագործակցելով, իրականացնում է երիտասարդների ֆինանսական գրագիտության բարելավման «ՖԼԱՅ» ծրագիրը: Նախագիծը նախատեսված է Հայաստանի տարբեր համալսարանների և դպրոցների ուսանողների ու աշակերտների համար, ովքեր չեն ուսումնասիրում տնտեսագիտություն կամ ֆինանսներ:

Նախագծի հիմքում ընկած են կրթության ոչ ֆորմալ ձևերը, որոնց միջոցով ծրագիրը մասնակիցների համար կդառնա էլ ավելի լիարժեք և արդյունավետ: Դասընթացները անցկացվում են Բրազիլիայից, Ուկրաինայից, ԱՄՆ-ից, Պարսկաստանից ժամանած դասախոսների կողմից, որոնց ժամանումը Հայաստան ապահովել է ԱՅՍԵԿ կազմակերպությունը: Նրանք պատրաստ են կիսելու իրենց գիտելիքները հայ երիտասարդների հետ` ֆինանսական գրագիտությունը եւ կշռադատված որոշումներ կայացնելու ունակությունը բարելավելու նպատակով:

2 ամիս շարունակ 15-20 համալսարաններից և դպրոցներից մոտ 400 մասնակից ստանալու է ընդհանուր գիտելիքներ անձնական ֆինանսների մասին: Նախագծում ընդգրկված են N 2 քոլեջը, Օհանյան քոլեջը, Եվրասիա համալսարանը, Հայաստանում Ֆրանսիական համալսարանը, Բրյուսովի անվան լեզվաբանական համալսարանը, Հայ-Ռուս (Սլավոնական) համալսարանը, N190 դպրոցը, N198 դպրոցը, N 83 դպրոցը, Հայաստանում Ֆրանսիական համալսարանը, Հայաստանում Ֆրանսիական համալսարանին կից քոլեջը եւ Քվանտ վարժարանը: