Ինչպես ցանկացած բարիք, արժեթղթերը ևս կարող են գնվել և վաճառվել շուկայում, որն անվանվում է արժեթղթերի շուկա: Այս շուկայի մասնակիցներն իրականացնում են արժեթղթերի թողարկում, տեղաբաշխում, առք ու վաճառք և այլն: Ընդ որում՝ արժեթղթերի շուկան կարող է լինել ոչ միայն ֆիզիկական վայր, այլ նաև վիրտուալ տիրույթ՝ էլեկտրոնային համակարգ, որը կապում է արժեթուղթ վաճառողներին և գնողներին:

Արժեթղթեր գնելու կամ վաճառելու համար կարող եք դիմել մասնագիտացված միջնորդներին։ Հայաստանում որպես միջնորդ հիմնականում հանդես են գալիս առևտրային բանկերը և ներդրումային ընկերությունները, որոնք ՀՀ տարածքում      ներդրումային գործունեություն իրականացնելու լիցենզիա են ստացել ՀՀ կենտրոնական բանկի կողմից և Հայաստանի ֆոնդային բորսայի (AMX) անդամ են։
Հայաստանում գործող Ներդրումային Ընկերությունների ցանկն ու կոնտակտային տվյալները կարող եք գտնել Կենտրոնական բանկի կայքում:

Եթե փնտրում եք արժեթղթեր գնելու հեշտ և արագ միջոց, կարող եք օգտվել նաև որոշ բանկերի Մոբայլ բանկինգ ծառայությունից: Դրա համար պետք է  կատարել հետևյալ քայլերը.

1. Մո՛ւտք գործեք համակարգ և ընտրե՛ք Ներդրումներ բաժինը:
2. Ընտրե՛ք Արժեթղթերի շուկա ենթաբաժինը և ծանոթացե՛ք բորսայում առկա արժեթղթերին (ներկայացված են ոչ միայն սպասարկող բանկի, այլև մյուս ցուցակված ընկերությունների արժեթղթերը):
3. Ուսումնասիրելով տարբեր արժեթղթերի ձեռքբերման պայմանները (թողարկող ընկերություն, արժեթղթի շուկայական արժեք, եկամտաբերություն, մարման ժամկետ և այլն)՝ գտե՛ք Ձեզ համար առավել նախընտրելի տարբերակը:
4. Հաստատե՛ք արժեթղթի ձեռքբերման հայտը:
5. Հիշե՛ք, որ արժեթուղթ ձեռք բերելու համար նախ անհրաժեշտ է բացել արժեթղթային հաշիվ Հայաստանի կենտրոնական դեպոզիտարիայում, որը ևս կարող եք իրականացնել Մոբայլ բանկինգի միջոցով՝ Արժեթղթերի հաշիվներ բաժնում:

Հնարավոր է ձեռք բերել նաև պետական պարտատոմսեր Գանձապետական պահառու համակարգի միջոցով: Հարկավոր է այցելել առևտրային բանկերի տարածքում տեղակայված գանձապետական պահառուի սպասարկման կետեր կամ գնել պարտատոմսեր առցանց եղանակով՝ minfin.am կայքի միջոցով:
Առցանց եղանակով պետական պարտատոմսեր ձեռք բերելու համար անհրաժեշտ է նույնականացման քարտի և նույնականացման քարտը կարդացող սարքի միջոցով գրանցվել համակարգում, ստանալ նույնականացման բանալի ու գաղտնաբառ և մուտք գործել համակարգ: